Si Noly King ay kabilang sa organisasyong Supreme Student Government (SSG) sa kanilang paaralan, na naglalayong magbigay ng libreng tutorial services para sa mga batang estudyante na hirap o hindi pa nakakabasa, gayundin sa mga batang kailangan matutukan sa pag-aaral. Ayon kay Noly, ang tutorial service ay isinasagawa nila tuwing vacant time. Sumali si Noly sa organisasyong ito simula nang siya ay nasa Grade Seven (7), at nanatiling parte nito hanggang ngayon. Ang SSG ang nagsasagawa rin ng ibang activities tulad Tree Planting, Leadership Training, Cleanliness and Waste Management. At mayroon din silang regular monthly meetings ng paaralan na sila rin kadalasan ang nangunguna.
Si Noly King ay pangalawang panganay sa anim (6) na anak nina Heidi De Guzman, 44, maybahay at Robert De Guzman, 43, kargador ng palay; kumikita siya ng P200/kada araw. Ngunit tuwing tag-ulan, malimit na walang trabaho si tatay.
Siya ay kilalang aktibo na mag-aaral, hindi lamang academically, mahilig din siyang makibahagi sa extra-curricular activities. Isa na rito ay ang pagsali sa SSG, kung saan siya ay laging nahahalal na officer. Noong nakaraang taon, siya ay nahalal bilang bise-presidente. At masasabi niyang ginagampanan niya ang kanyang tungkulin sa abot ng kanyang makakaya—para sa kanyang paaralan, guro at kamag-aaral.
Noong hindi pa sila kabilang sa Pantawid Pamilya, hindi nagiging sapat ang sinasahod ni tatay Robert sa pagiging kargador ng palay. Dumarating ang pagkakataon na walang-wala sila. Kapag walang baon ang mga bata, hindi na sila pinapapasok ni nanay Heidi. Ngunit dahil pursigido si Noly na makatapos ng pag-aaral, nilalakad niya mula sa kanilang bahay hanggang sa eskwelahan. Hindi na rin siya nakakasama sa mga extra-curricular activities na gusto niyang salihan. “Gustong-gusto ko pong sumama, pero dahil wala po akong pamasahe at allowance, hindi po ako nakakasama,” gunita ni Noly.
Ayon kay Noly, malaki ang naitulong ng Pantawid Pamilya sa pinansiyal na aspeto ng kanilang buhay. Dahil sa Pantawid Pamilya, mayroon na siyang araw-araw na allowance at hindi na nagkukulangan. Lubos itong nakatulong sa kanyang pang-edukasyon. Hindi na niya pinoproblema kung saan kukuha ng panggastos kung may gusto siyang salihan na activity sa kanilaang paaralan. Ngayon, mas lalo siyang naengganyo na maging aktibo sa SSG.
Kwento ni Noly, naging tuluy-tuloy na rin ang pagpunta ng kanyang nanay Heidi sa health center. At kung dati si nanay Heidi ay mahilig maglaro ng baraha, dahil sa mga natutunan sa Family Development Session (FDS), ni hindi na niya alam ang salitang “pagsusugal”. Natuturuan din ang kanyang nanay kung ano ang dapat gawin para hindi na bumalik sa dating bisyo. At ayon sa kanya, nakatulong din ang FDS sa kanilang pamilya sa lalo pang pagpapatibay ng kanilang relasyon sa bawat isa. Kapag may problema, mas nagiging bukas na si nanay Heidi, lalo na sa panganay at kay Noly. “Kung dati mainitin ang ulo, ngayon mas nagiging pasensyoso ako,” reaksyon naman ni tatay Robert.
Sa mahigit tatlong taong pagiging Pantawid Pamilya beneficiary, masasabi nina nanay Heidi at tatay Robert na malaki ang pagbabago sa kanilang buhay sa tulong ng programa. Nang makaipon sila sa tulong ng Pantawid Pamilya, ay nagtayo sila ng maliit na tindahan. “Kung dati, pag wala, wala talaga, pero ngayon, nagkaroon ng malaking kaginhawaan sa pamumuhay namin,” dagdag ni tatay Robert. At nitong pasukan, tatlo na sa kanilang mga anak ang nag-aaral.
Sa ngayon, patuloy ang kanilang pag-iipon at pagsusumikap na maitaguyod ang mga anak at makatapos sa pag-aaral.
Masayang ikinuwento rin ni Noly na sa kanyang paaralan, hindi minamaliit ang mga kabilang sa Pantawid Pamilya. “Ipinagmamalaki ko na ako ay isang Pantawid beneficiary,” sabi ni Noly. Pangarap ni Noly na maging guro, ito rin ang pangarap ni nanay Heidi para sa kanya—pangarap na halos nahahawakan na nila. ### (SMU/Majah Diwa)
