“Nagmamahalan. Masaya,” tanging ang dalawang katagang paulit-ulit na nasabi ng mag-asawang sina Abdul Mamiyalli, 21, at Nerissa Mamiyalli, 19, matapos ang tatlong araw na Family Camp for Homeless Street Families, nitong nakaraang June 1-3, sa Anne Racquel’s Hillside Resort and Hotel, Olongapo, Zambales.

Ang naturang Family camp ay dinaluhan ng mahigit 200 na mga benepisyaryo ng Modified Conditional Cash Transfer (MCCT) na pawang taga-Angeles City, at Mabalacat City, Pampanga, Hagonoy, Bulacan, at Olongapo, Zambales.

Ito ay naglalayong palakasin at pagyabungin ang pisikal, mental, emosyonal, sosyal, at ispiritwal na antas ng mga benepisyaryo ng nasabing programa ng Department of Social Welfare and Development (DSWD) sa pamamagitan ng team building, sport fest, at ilang sesyon ng pag-aaral tungkol sa kahalagahan ng katawa, pagkatao, pamilya, at pagsusumikap sa buhay.

“Napakasarap ng experience namin dito. Ang sarap makisalamuha sa tao. Lalo na ‘yung apo ko, sobrang nag-enjoy s’ya. Ganun din ako, at natutunan kung ‘di lang kami dapat umasa nang pang-habang buhay sa MCCT,” pagkukukwento ni Eugenia Basillio, 51.

Isa sa mga pinaka binigyang lundo ng nasabing akitibidad ay ang renewal of vows ng mga mag-aasawa. “Parang naulit muli ang kasal namin. Ang sarap kasi noon ay sa Huwes lang kami ikinasal, wala pang picture. Samantalang ngayon ang dami na ngang bisita, may handa at may kodakan pa,” sabi ni Gilbert Aquino, 46. Ito ay sinundan ng pagbibigay ng mga gantimpala at gamit sa eskwela.

Hindi lang pagbibigay ng cash grant ang layon ng programang MCCT kundi tulungan ang mga benepisyaryo nito na maging responsableng magulang at wala na ring mga batang palaboy laboy sa lansangan. ### (Andyleen C. Feje)