“Kahit na gaano kahirap ang buhay, ni hindi ko naisip na sabihin sa mga anak ko na ‘wag muna kayong mag-aral. Pangarap ko talagang magkaroon ng magandang buhay, makatapos ang mga anak ko ng pag-aaral, at magkaroon mas maayos na trabaho,” bungad ni Beverly Alegado, 34, Parent-Leader ng Sitio Sapat, Barangay Maloma, San Felipe, Zambales.

Noong una ay si Dennis Alegado, 39, lamang ang may trabaho sa pamilya nila. Siya ay isang mangingisda. Kung minsan ay naglalabada lamang si Beverly para lang makadagdag sa panggastos nila sa araw-araw kaya naman madalang pa sa kidlat ng Mayo, aniya, kung makatikim ang kanyang mga anak ng bagong uniform. Ang bahay nila ay gawa lang sa cogon at talahib.

Pero gaano man kahirap ang buhay, aniya, ay hindi niya pinaramdam sa kaniyang mga anak na kailangan nilang huminto sa pag-aaral. Ito ay nais niya rin sanang ibahagi sa mga katulad niyang mahihirap na magulang sa kanilang lugar. Gayumpaman, ‘sino ba naman ako para pakinggan nila,’ aniya.

Ngunit nang dumating ang Pantawid Pamilyang Pilipino sa kanilang buhay ay natuto siyang magsalita sa harap ng mga tao sa tulong ng Family Development Session (FDS) at Leadership Training para sa mga Parent-Leader.

“Noong una ay ni hindi man lang ako lumalabas sa bahay. Ngunit nung dumating ang Pantawid Pamilya ay nabago ang buhay ko. Ako ay naging Parent-Leader, Barangay Health Worker, Barangay Nutrition Scholar, at ngayon ay Day Care Worker. Kung may iba pang opportunity ay hindi ako magdadalawang isip. Nabuksan ang aking isipan, sabi ko nga ay kaya ko naman pala bakit hindi ko pa ginawa noon,” wika ni Beverly. At nito nga lang nakaraang isang araw siya ay nag-apply naman bilang Caregiver sa magbubukas na bagong ospital sa Subic Bay Metropolitan Area.

At kung may nababalitaan siyang hindi na nagpapaaral ng kanilang mga anak sa kanilang lugar ay matyaga niya itong pinupuntahan upang makausap at bigyan ng lakas ng loob. “Madalas kong ginagawang example ang sarili ko at pamilya ko,” aniya.

At ngayong nalalapit na naman ang pasukan, nakahanda na ang gamit ng mga bata Mayo pa lamang at sabay na silang papasok sa eskwela. ### (Andyleen C. Feje)