Taong 2014 nang tamaan ng Bagyong Yoyong ang bayan ng Dingalan, Aurora. Mula noon, laging binabalot ng takot ang residente sa tuwing uulan. Isa sa mga pinangangambahan nila ay ang pag-apaw ng ilog na umamabot sa mga kabahayan, dahilan ng madalas na paglikas. Ito ang madalas na eksena sa Brgy. Davil Davilan hanggang sa Poblacion ng bayan.

Upang masolusyunan ang suliraning kinakaharap, naging bahagi ang Dingalan sa implementasyon ng programang Climate Change Adaptation and Mitigation Disaster Risk Reduction (CCAM-DRR) ng DSWD. Isa sa mga proyekto nito ay ang paglalagay ng gabion sa daluyan ng ilog.

Ang gabion ay isang sisidlan na may karaniwang laman na mga pinagpapatong-patong na bato. Sa pagpapatupad ng CCAM-DRR, ang mga benepisyaryo ay maghahakot ng mga bato sa ilog at isasalansan upang gawing gabion. Ito ay unang inilalatag sa gilid ng ilog sa Brgy. Davil Davilan.

Dahil sa kagandahang dulot nito, pinondohan pa ang pagpapagawa nito sa halos kabuuan ng ilog sa Dingalan–hanggang Barangay Aplaya. Kasama rin sa programa ang cash-for-work na ibinabahagi kapalit ng 10 araw ng pagtatrabaho.

Kaantabay sa pagpapatupad ng CCAM-DRR ang mga kapitan ng barangay. Sila ang mga nangangasiwa at nagmomonitor ng proyekto. Ayon kay Punong Barangay Abner Narciso ng Brgy. Davil Davilan, “mas maganda ang gabion dahil tali-tali, [ang mga bato] hindi ito kayang matibag.”

Dagdag pa niya kahit tapos na ang implementasyon ng CCAM-DRR patuloy pa rin ang paghahakot at pagsasalansan ng mga residente. 

“Nagvolunteer sila para maisakatuparan at maiayos namin itong mga gabion. Talagang willing sila dahil nakita na nila kung gaano kalakas ang tumama ‘yung bagyo noong 2004,” kwento niya.

“Hindi na kami nangangamba–nakakatulog na nang maayos,” dagdag pa ni Kapitan Leo Agustin ng Brgy. Aplaya, magbuhat nang maitayo ang mga gabion sa kanilang barangay.

Bukod sa layunin ng CCAM-DRR na labanan ang epekto ng climate change, malaki ang naiaambag ng gabion sa Dingalan sa kapanatagan ng kalooban at pagiging matatag ng mga mamamayan.