Hindi na bago ang pagbaha sa bayan ng La Paz, Tarlac. Ito ay dahil na rin sa geographical na lokasyon nito, isama pa rito ang kontribusyon ng pagdami ng basura. Bilang paglaban sa mga ganitong epekto ng kalamidad, kabilang ang Bayan ng La Paz sa mga aktibong nagpapatupad ng programang Climate Change Adaptation and Mitigation Disaster Risk Reduction (CCAM-DRR) ng DSWD. Isa sa mga naunang proyekto rito ay ang paglilinis ng mga kanal, na kalauna’y itinuon sa Materials Recovery Facility (MRF).
Ayon kay Pedro F. Cruz Jr., Municipal Environment and Natural Resources Officer (MENRO), “ang MRF ay kung saan natin pinoproseso ang mga basura [ng kinolekta.]” Kasama sa prosesong kaniyang nabanggit ay ang paghihiwalay ng mga nabubulok at mga maaari pang pakinabangan.
Bawat barangay ay may sariling MRF bilang pagtugon na rin sa ordinansa ng waste management. Dito pansamantalang nilalagay ang mga nakahiwalay na basura na nakolekta sa mga kabahayan. Pagkatapos ay ipapadala ang mga ito sa Municipal MRF.
Sa Municipal MRF, pinoproseso muli ang mga nakolektang basura gamit ang mga espesyal na kagamitan. Sa pagkakataong ito, pinaghihiwalay na ang nabubulok upang gawing pataba, at mga plastic at bote upang gawing pavers o bricks. Samantala, ang mga natirang mga basurang hindi mapapakinabangan ay mapupunta sa landfill.
Pinupulbos ang mga materyal na gawa sa plastic at salamin pagkatapos ay hinahalo ito sa buhangin at semento upang gawing bricks, na siyang gagamitin sa pagpapatayo ng mga imprastraktura sa bayan. Kapag pinagsama ang isang timbang pinulbos na salamin, dalawang timbang buhangin, ¼ ng timbang plastic, at kalahating sako ng semento ay makakagawa ng 45 bricks. Habang ang mga nabubulok na basura naman ay hinahalo sa lupa upang gawing pataba.
Ang mga benepisyaryo ng CCAM-DRR ang mga nagse-segregate ng mga basura, at tumutulong sa paggawa ng bricks at pataba. Naging daan ang programang ito sa pagpapalawak ng kamalayan at kaalaman ng mga mamamayan patungkol sa tamang pag-segregate ng basura. Tulad na lamang ni Ria Angela Nacpil, benepisyaryo ng programa, “’yong mga basura dito [sa amin] hindi na sinusunog, hindi na kalat-kalat, dinadala na sa isang lugar [doon] sa MRF.” “Dati hindi naman namin ginagawa ‘yun [pagsesegregate], pagsusunog talaga ang ginagawa namin,” dagdag pa niya.
Ang CCAM-DRR ay naglalayong tumugon sa mga epekto ng climate change. Sa pagpapatupad nito nabawasan na ang kalat na nagiging sanhi ng pagbaha sa La Paz. Naisakatuparan ito sa pagtutulungan ng mga bawat isa mula sa mga nagpapatupad ng programa hanggang sa pagsunod ng mga mamamayan.
Sa hinaharap, sinusulong ang MRF na maging micro-enterprise upang mapagkakitaan ng bayan. Ayon kay Eunice Ocampo, Municipal Social Welfare and Development Officer, “ang basurang akala mo hindi mo na mapapakinabangan, at ang mga basurang akala mo magiging problema, pwede pala itong maging main source ng income ng LGU at ng mga mamamayan ng bayan ng La Paz.”
