“Minsan sinabi nila na wala ng pag-asa ang mga katutubo, pero mas dapat tayong maniwala sa ating mga sarili, sa mga kakayahan natin. Kaya siguro ipagkaloob sa amin ang ganitong pagkilala, para makita ng iba na may pag-asa tayong lahat na makaahon sa kahirapan.”

Ito ang ilan sa mga naging linya ng miyembero ng Pamilya ng Dela Cruz, mula sa Casiguran, Aurora, matapos tanghalin bilang 2018 Huwarang Pantawid Pamilya. Ang Pamilya Dela Cruz ay benepisyaryo ng Modified Conditional Cash Transfer (MCCT) sa Gitnang Luzon. Ang MCCT tulad ng Regular Conditional Cash Transfer (RCCT) ay isang sanga ng Pantawid Pamilyang Pilipino Program (4Ps) na nakatutok naman sa mga Homeless Street Families (HSF), Indigenous People (IPs) in Geographically Isolated and Disadvantaged Area (GIDA), at Families in Need of Special Protection.

Ang Pamilya Dela Cruz ay katutubong Pamilya (mula sa tribong Agta ng Aurora at Aeta ng Zambales) na nagsusulong ng mga pangkalusugan, pang-edukasyon at pangkultural na karapatan sa Sitio Dumaguipo, Brgy. Cozo, Casiguran, Aurora (basahin ang buong kwento ng Pamilya Dela Cruz).

Kinilala naman bilang 1st Runner-up ang Pamilya Saltiban ng Talugtug, Nueva Ecija (basahin ang buong kwento ng Pamilya Saltiban), na pawang mga Community Volunteers (CVs) ng Kapit-Bisig Laban sa Kahirapan Comprehensive and Integrated Delivery of Social Services (Kalahi-CIDSS), isa pang programa ng DSWD na nakatutok naman sa empowerment at good governance. And 2nd Runner-up naman ay ang Pamilya Bagat ng San Felipe, Zambales (basahin ang buong kwento ng Pamilya Bagat), na bahagi rin ng katutubong komunidad na nagsusulong ng mga karapatan sa  usapin ng ancestral domain.

Ilan pa sa mga pinarangalang pamilya ay ang: Pamilya Pelicano ng Morong, Bataan; Pamilya Flores ng San Miguel, Bulacan; Pamilya Bulaon ng City of San Fernando, Pampanga; at, Pamilya Pagarigan ng Ramos, Tarlac.

Ngayong taon ay ipinadiriwang ang ika-25 na National Family Week, na may temang “Tungo sa Matatag, Masagana at Mapayapang Pamilya.” Kinililala ng DSWD Field Office III ang mga natatanging pamilya ng 4Ps sa Gitnang Luzon.

“Maki-isa sa ating layunin na magkaroon ng pamilyang nagsusumikap, nagtutulungan upang mapagtagumpayan ang anumang mga hamon na darating. Mabuhay ang pamilyang Pilipino!” pagbibigay diin ni DSWD FO III Dir. Gemma B. Gabuya.

#PinoyFamGoals
#DSWDGitnangLuzon
#MayMalasakitSaPamilya
#2018NationalFamilyWeek