“The start of BER months signals mendicancy. Mendicancy breeds hazards, degrades dignity, and breeds crime which leads to exploitation. This issue is multi-dimensional (Ang simula ng BER months ay s’ya ring hudyat ng mendicancy. Ang mendicancy nama’y nagdudulot ng mga panganib, at nagbubunga ng krimen na s’ya namang nagiging dulot ng eksploystasyon. Ang isyung ito ay multaydimensyunal),” ito ang ilan sa mga naging mensahe ng DSWD Field Office III Regional Director, Gemma B. Gabuya sa kakatapos na ikalawang pagpupulong ng Task Force Kalinga: Sagip Katutubo, na ginanap sa bayan ng Porac, Pampanga, August 14.

Ang Task Force Kalinga: Sagip Katutubo ay isang inter-agency committee na naglalayong makabuo ng koordinasyon, makakolekta ng mga plano, at magsilbing taga-pagimplementa ng mga tama at nararapat na interbensyon para sa mga biktima ng issue ng mendicancy o pamamalimos at panlilimos. Ang pangkalahatang layunin nito ay tuluyan ng mabura ang mga kaso ng mendicancy sa Gitnang Luzon.

“Ang pagbuo ng ganitong task force ay napapanahon. Para makita ng lahat na hindi pamamalimos at panlilimos ang solusyon. Ang kailangan namin ay farm to market road,” sabi ni Barangay Captain Benzon King, ng Barangay Inararo. Ang naturang barangay pati na rin ang Barangay Villa Maria ay ilan sa mga napag-alamang red sites areas sa bayan ng Porac, kung saan may mga kaso ng katutubong patuloy na tumatangkilik sa kultura ng panlilimos at mga panganib na kaakibat nito. Naniniwala rin si Capt. Benzon na kung tamang tulong ang maibibigay sa kanilang mga katutubo ay magkakaroon sila ng tunay na pag-unlad, tulad ng pagkakaroon ng farm to market road na kanilang kailangan sa paghahatid sa merkado ng kanilang mga tanim na gulay at prutas.

Ang DSWD Field Office III, kasama ang National Commission on Indigenous Peoples (NCIP), ay ang ulo ng nasabing kumite. Ilan sa mga aktibong miyembro ng kumite ay ang mga nasyonal na ahensya tulad ng Philippine Information Agency (PIA), Department of Health (DOH), Department of the Interior and Local Government (DILG), Philippine National Police (PNP), at Commission on Human Rights. Kasama rin ang mga Local Government Units (LGUs) na may mataas na kaso (red flag identified sites) ng mendicancy tulad ng bayan ng Porac at Floridablanca sa lalawigan ng Pampanga; bayan ng Capas at Bamban sa lalawigan ng Tarlac; at bayan ng Botolan, sa lalawigan ng Zambales; media partner tulad ng CLTV36; at iba pang aktibong Civil Society Organizations (CSOs).

“Malaking tulong ito para sa mga katutubo. Makakatulong ito para matutukan ang maling pagkilala at pagtanggap ng mga tao sa kultura ng pamamalimos,” bahagi ni Barangay Captain Rogelio Valencia, mula sa Barangay Villa Maria, na kabahagi rin sa pagpupulong.

Ilan sa mga nakalatag na mga aktibidad ng kumite para sa mga katutubo ay ang Donor’s Forum na pangungunahan ng mg CSOs at Indigenous Peoples Mandatory Representatives (IPMRs), sportsfest para sa darating na buwan ng Indigenous Peoples (IPs) sa darating na Oktubre, PaskuJuan (Pasko ni Juan) o Christmas Celebration, at IP Health Summit ngayong buwan, na pangungunahan naman ng DOH.### (Andyleen C. Feje)

image_pdfimage_print