Municipality of Gerona, Tarlac—Sa ikaapat na pagkakatao’y muling bumisita ang DSWD Field Office III sa isa sa mga munisipyo ng Gitnang Luzon na may mataas na kaso (red flag identified area) ng early marriage at/ early pregnancy upang magsawa ng GAD mapping nitong kakatapos lamang na ika-9 ng Agosto, taong 2017.
Layunin ng naturang aktibidad na palabasin ang issues at gaps ng kinakaharap ng mga benepisyaryo ng Pantawid na maaaring hindi napapaloob sa Pantawid Pamilya Information System (PPIS). Gayundin ang makapagbuo ng isang task force o grupo na makakatuwang ng benepisyaryo sa kinakaharap nilang issues at gaps na may kinalaman sa gender o kasarian.
“Ang pinakamabigat na layunin ng 4Ps (Pantawid Pamilyang Pilipino Program) ay hindi lamang palakasin ang skills na mayroon ang mga benepisyaryo nito at magkaroon sila ng financial literacy, kundi ang mas mapalawak pa ang kanilang development bilang tao, sa kabuuan,” pagbibigay diin ni Ms. Daisy Tenerife, Gender and Development (GAD) Focal Person.
Binisita rin ng DSWD Regional staff at provincial staff sa pangunguna ni Ms. Daisy Madrid, Provincial Link ng Tarlac, ang isang pamilyang patuloy na mababa ang compliance rate pagdating sa edukasyon. Napag-alaman ng grupo na hindi lamang pala ito isang simpleng kaso ng teenage pregnancy. Ang paghinto ng pag-aaral ni “Abigail” ay nag-ugat pa sa pagkakasakit ng pareho niyang mga magulang. Mula ng magupo ng stroke ang kanilang ilaw ng tahanan (na nagsisilbing tipagtaguyod ng pamilya, sapagkat ang kanilang ama ay may sakit sa puso) ay tila nagupo na rin ang pag-asa ni Abigail na makatapos ng pag-aaral. Napilitan siyang mangibang- bayan at mamasukan bilang kasambahay, kung saan niya nakilala ang kaniya ngayong kinakasama. Nakipag-live in si Abigail, sa edad na 18 sa pag-aakalaang siya ay buntis. Isa lamang si Abigail sa 17 reported/disclosed (4Ps beneficiaries) na kaso ng early pregnancy/ marriage sa mga kabataan sa bayan ng Gerona.
Bilang pagtugon sa ganitong mga kasong kinakaharap ng mga kabataan at iba pang miyembro ng 4Ps ay bumuo ang bayan ng Gerona, sa pangunguna ng Municipal Social Welfare and Development Office (MSWDO), kasama rin ang local Department of Education (DepEd), Philippine National Police (PNP), Municipal Health Office (MHO), Violence and Women and Children (VAWC), Civil Society Organization (CSO), Municipal Action Team (MAT), at Municipal Mayor, ng task force na s’yang tututok sa mga reported/disclosed data na may kinalaman sa gender.
“Ang pagbuo ng task force na ito ay una, para sa ating mga kababayan, at para sa bayan. Hindi lang naman tayo ang may ganitong problema, national issues ang mga ito. Kaya naman, baka sa dahil sa efforts natin na ito ay may matutunan din sa atin ang ibang bayan,” bahagi ni Engr. Eloy C. Eclar, Municipal Mayor.
Magiging pangunahing katuwang din nila rito ang mga Parent-Leader sa bayan ng Gerona. Isa na rito si Nanay Rhea Estabillo, na nagsabing, “naranasan ko pong mabugbog noon, kaya naman, ayokong nakakakita ng babaeng may pasa. Kaya kung mayroon mang naaabuso sa aking mga miyembro ay handa akong ipaglaban sila, saan man kami makarating.”
Sa tulong ng Family Develoment Session at mga seminars at capability building training ay mas napalawak pa ang kaalaman ng mga Parent-Leader sa mga karapatan at tungkulin nila bilang isang aktibong benepisyaryo.
“Naiintindihan ko po at pinapaliwanag sa aking mga miyembro na ang grant na nakukuha namin sa 4Ps ay hindi pangtustos kung hindi pandugtong lamang sa kung ano ang kulang at mayroon kami. Kaya kailangan pong samahan ng sikap,” bahagi ni Tatay Rolando Salsedo, ang nag-iisang lalaking Parent-Leader ng Gerona, at s’ya ring kinilalang Best Parent-Leader ng bayan. ### (Andyleen C. Feje)
