Groundbreaking ceremony. Ito ang hudyat nang pagsisimula ng proyektong pagsasayos ng baku-bako at binabahang kalsada sa Purok 6, Ilog Baliwag, Quezon, Nueva Ecija.

Labis ang tuwa ng mga taga barangay Ilog Baliwag, Quezon Nueva Ecija dahil masisimulan na ang proyektong pagsasaayos sa baku-bako at binabahang daan ng Purok 6, ani G. Avelina Dela Cruz, pinuno ng Municipal Social Welfare and Development Office (MSWDO) ng Quezon.

Sa pamamagitan ng Kapit Bisig Laban sa Kahirapan-Comprehensive and Integrated Delivery of Social Services (KALAHI-CIDSS) – National Community Driven Development (NCDDP) ng Department of Social Welfare and Development(DSWD) na naglaan ng Php3.5 milyon, ang proyekto ay maisakakatuparan na. Ito ay sa pakikipagtulungan na rin ng barangay, munisipalidad, volunteers, at National Irrigation Administration (NIA).

Ang proyekto ay naglalayong magkaroon ng maayos na daan at tutugon sa mabilis na pagbibyahe ng mga resident eng barangay.

“Hindi naging madali ang pinagdaanan upang maisakatuparan ang proyektong ito,” balik tanaw ni G. Dela Cruz. Maraming hirap na pinagdaanan bago maaprubahan ang proyekto dagdag pa rito ang hindi naging madali ang pag-iimbita sa mga volunteers na dumalo sa mga assembly noong umpisa.

Ang Barangay, Ilog Baliwag ay binubuo ng 815 households at may kabuuang populasyon na 3,546.  Ang purok 6 ay isa sa may pinakamalaking populasyon ng barangay Ilog Baliwag na may kabuuang 881 katao.

“Napakahalaga ng daang ito,” dagdag pa ni G. Dela Cruz. Ito kasi ang pangunahing daanan ng mga estudyante tungo sa kanilang paaralan na may layong isang kilometro (elementarya) at nasa kabilang barangay naman ang paaralan para sa mga estudyante sa high school. Hirap ang mga estudyante sa pagpasok tuwing umuulan at madalas ay doble ang kanilang pamasahe dahil sa maputik at lubak-lubak na daan. Dahil hirap ang mga sasakyan gaya ng jeepney at tricycle, kadalasan ay nahuhuli sa klase ang mga estudyante.

“Apektado ng sirang daan ang aming kabuhayan na karaniwan ay pagsasaka dahil sa mahabang oras na ginugugol namin sa pagbibyahe ng aming mga ang aning gulay at prutas sa palengke at mga karatig bayan,” ang sabi ng isang volunteer sa barangay. Masaya kami sa proyektong ito dahil mas gagaan na ang aming pagbibyahe, dagdag pa niya. ### (Jeffrey D. Peraliza)

 

image_pdfimage_print