“Kailangan kilalanin kung sino sila, kung sino ang ating IP mendicants; alamin kung nasaan sila nang hindi nasasayang ang ating programs and services,” ito ang isa sa mga binigyang diin ni DSWD Field Office III Regional Director Gemma B. Gabuya, sa kakatapos lamang na ika limang (5) Assembly ng Task Force Kalinga: Sagip Katutubo, ngayong ika-10 ng Nobyembre 2017, na ginanap sa Bamban, Tarlac.

Ang bayan ng Tarlac ang nagsisilbing Model Local Government Unit (LGU) ng iba pang mga LGU na may mga residenteng Indigenous People (IP) sapagkat ang baya’y walang kaso (recorded) ng mendicancy magmula pa ng taong 1998 sa mga katutubong naninirahan dito. Ang hindi birong gawang ito ay napagtagumpay ng bayan sa tulong na rin ng mga proyektong bigay ng Local Government Unit (LGU) at partner National Government Organizations (NGOs) tulad ng University of Sto. Tomas (UST) (bisitahin https://www.facebook.com/dswdfo3/posts/795729323885092 at alamin kung bakit may zero mendicants sa Bamban, Tarlac).

“Kapag tulong-tulong ang mga mga ng gobyerno at iba pang pribadong sektor ay mas mabilis na naaabot ang mga layunin ng kanilang samahan,” bahagi ni Gng. Lucia Guya, Day Care Center Worker ng Sitio Mabilog, Bamban, Tarlac.

Ang Task Force Kalinga: Sagip Katutubo ay isang inter-agency committee na naglalayong makabuo ng koordinasyon, makakolekta ng mga plano, at magsilbing taga-pag-implementa ng mga tama at nararapat na interbensyon para sa mga biktima ng issue ng mendicancy o pamamalimos at panlilimos. Ang pangkalahatang layunin nito ay tuluyan ng mabura ang mga kaso ng mendicancy sa Gitnang Luzon.

Kaya naman labis ang pasasalamat ni Jermie Samaoang, isang katutubo at IP Mandatory Representative (IPMR) Office Personnel ng bayan ng Capas, Tarlac, na isa rin sa may mga kaso ng mendicancy sa Gitnang Luzon. “Maganda po ang layon ng Task Force SAGIP-Katutubo na imulat ang IPs sa panganib na hatid ng kultura ng pamamalimos, at sinasabayan pa nila ito ng mga estratihiya upang mas mapaunlad pa naming katutubo ang aming sarili,” bahagi niya.

Isa sa mga tinutukan ngayon ng Task Force ay ang pagtatala o profiling ng lahat ng katutubo sa Gitnang Luzon, at ito ay naumpisahan na sa ilang bayan tulad ng Porac, Pampanga. Inaasahan nilang matatapos ang profiling bago pa man matapos ang taong 2017, ito ay bilang preparasyon sa pagpapadaloy ng mga tamang interbensyong tunay na kailangan ng mga katutubo upang tuluyan na silang mailayo sa kultura ng pamamalimos. Layon ng Task Force SAGIP-Katutubo na makapagbigay ng akma, tama, at lapat na serbisyo. ### (Andyleen C. Feje)

image_pdfimage_print